Os 95 participantes no Campus de Verán XuvenCiencia de Lugo presentaron esta tarde un total de 15 proxectos, pero o grupo Aresa distinguiu en especial os estudantes promotores do proxecto “Árbores en tubos de ensaio”.
Esta tarde tivo lugar na Escola Politécnica Superior de Enxeñaría de Lugo a clausura da edición de 2023 do XuvenCiencia, na que se fixo efectiva a entrega do Premio Aresa Júnior de Desenvolvemento Rural que concede por noveno ano o grupo Aresa.
A convocatoria xuntou uns 95 participantes, rapazas e rapaces de toda Galicia estudantes de 4.º da ESO e de BAC, que, dentro do programa de actividades deste campus de verán, levaron a cabo diversos proxectos científicos baixo a dirección de profesores da Universidade de Santiago de Compostela.
O fallo dos membros do xurado converteu en gañadores do IX Premio Aresa Júnior a Lola Monteiro Molíns (Ferrol), Ángela Monteagudo León (Ferrol), Andrea María Lourido Rodríguez (Ferrol), Raquel Barreiro Caruncho (Bertamiráns), Galir Macía López (Lugo), Candela Rodríguez Cela (Ribadeo) e Óscar Rodríguez de Vivero (Lugo).
O premio, consistente nun diploma honorífico e nun regalo, foilles entregado en man por Carlota López, vicepresidenta de Aresa.
